Libra e Telefonit të Malit Zi

9/11 Loose Change

REKLAMOJENI VEHTEN QË EDHE NE TË REKLAMOHEMI !!!

UDSH SHËNON DITËN E FORMIMIT
POLITIKA SHQIPTARE DHE MESAZHI AMERIKAn 10.11.2008
Të ndahet shapi nga sheqeri 6.11.2008
Dinosha:Lojën e kujt e do media shqipe?2.11.2008

M’i gëzofsh 15 pranvera
Koha do të dëshmojë se UDSH, me një program realist e pragmatik, të bazuar mbi standarde demokratike europiane të demokracive shumënacionale, mbi të gjitha me një veprim të sinqertë e transparent do t`ia dalë ta kthejë në binarë të duhur trenin e aspiratave legjitime për faktorizimin e shqiptarëve dhe për përmirësimin e pozitës së tyre në Mal të Zi.


Ferhat Dinosha

Më 21 nëntor 1993 është themeluar partia e dytë e shqiptarëve në Mal të Zi, Unioni Demokratik i Shqiptarëe. Mospajtimet në udhëheqjen e partisë së parë, LD në MZ, dështimi i saj në zgjedhjet parlamentare të vitit 1992, pas përkrahjes plebishitare që e kishte fituar në zgjedhjet e para të vitit 1990, sjelljet dhe hapat simptomatikë aventurierë, kokëfortësia dhe mospërfillja e kritikës së brendshme, kanë bërë që një pjesë e liderëve të LD në MZ, në krye me profesorin e dalluar e partiotin e kulluar, të ndjerin Bajram Rexha, të vendosë të themelojë partinë e re UDSH.
Koha do të dëshmojë se UDSH, me një program realist e pragmatik, të bazuar mbi standarde demokratike europiane të demokracive shumënacionale, mbi të gjitha me një veprim të sinqertë e transparent do t`ia dalë ta kthejë në binarë të duhur trenin e aspiratave legjitime për faktorizimin e shqiptarëve dhe për përmirësimin e pozitës së tyre në Mal të Zi, por edhe për kontributin në ngjarjet më të rëndësishme të kohës, në Mal të Zi e në Rajon.
UDSH bëhet parti parlamentare në vitin 1996 dhe këtë status vazhdon ta ruajë edhe sot.
Kjo i ka mundësuar që projektet e tij dhe mënyra e zbërthimit të tyre në opinion, ta bëjnë subjekt të pakapërcyeshëm në të gjitha debatat e brenshme apo ndërkombëtare për pozitën dhe statusin e shqiptarëve në Mal të Zi.
Tri kanë qenë shtyllat e programit politik të UDSH-së në fazën e deritashme të proceseve demokratike në Mal të Zi e në Rajon: Platforma për status të veçantë të shqiptarëve në Mal të Zi, kontributi për kauzën numër 1 të shqitparëve në fundshekullin e shkuar dhe fillimin e këtij shekulli - pavarësinë e Kosovës dhe kontributi për pavarësinë e Malit të Zi, që rrethanat e kishin pozicionuar shumë të rëndësishme edhe për pavarësinë e Kosovës.
Duhet thënë se, në këto procese, UDSH është sjellur ndryshe nga partitë e tjera shqiptare dhe koha do ta dëshmojë se kush ka patur të drejtë. Por, që tani mund të thuhet se, falë angazhimeve politike dhe aftësisë që fjalët t`i bëjë vepra, UDSH, në këtë periudhë, bëhet partia më e fortë shqiptare, e cila bën që kontributi i shqiptarëve në Mal të Zi në ruajtjen e stabilitetit dhe të paqes në Mal të Zi, si dhe në krijimin e logjistikave për marrëdhënie të reja ndërmjet popujve e shteteve në Ballkan, të jetë shumëfish më i madh se numri i tyre në popullsinë e këtushme.
Pa përkrahjen e partive të tjera shqiptare, ose me kundërshtimin e tyre, UDSH, në bashkëpunim me forcat demokratike në Mal të Zi dhe me faktorin ndërkombëtar, ia del të realizojë projekte të rëndësishme që përmirësojnë pozitën e shqiptarëve, siç janë:
- formimi i Ministrisë për të Drejtat e Pakicave,
- Ligji për përdorimin e simboleve kombëtare,
- Platforma për status të veçantë të shqiptarëve në Mal të Zi,
- spitali i parë i maternitetit në Ulqin,
- pikat e reja kufitare me Republikën e Shqipërisë (Muriqani e Vermosha),
- fakulteti i parë shqip në Podgoricë,
- Komuna Urbane e Tuzit, si projekt-pilot i një faze kalimtare drejt komunës së plotë,
- Ligji për të drejtat dhe liritë e pakicave,
- Panairi i Librit në Ulqin,
- Festivali i Këngës për Fëmijë në Ulqin,
- finalizimi i qendrave të kulturës në Ulqin e në Tuz,
- zyrtarizimi i gjuhës shqipe në Komunën e Plavës….
- kyçja e përfaqësuesve të partisë shqiptare edhe në përfaqësitë diplomatike të Malit të Zi, pas pavarësimit të tij më 2006,
- kontributi në përmirësimin e marrëdhënieve fqinjësore ndërmjet Malit të Zi e Shqipërisë,
- kontributi për njohjen e Kosovës së pavarur nga ana e Malit të Zi….
- vendosja e partneritetit me qeverinë antimillosheviqiane të Malit të Zi…
S`do mend se këto dhe projekte të tjera i bëjnë qesharakë zërat që ende dëgjohen se në Mal të Zi nuk na u paska bërë asgjë për përmirësimin e pozitës së shqiptarëve në këtë shtet.
Por, ato dalin nga subjektet të cilat pas 18 vjet veprimi nuk kanë asgjë pas vetes ose nga ato të cilave pas 16 viteve angazhime të tjera u bie ndërmend se është koha të shesin super-patriotizëm.
Hiq kontributet dhe projektet e sipërpërmendura të UDSH-së, çka na mbeti?
Edhe kontributi i UDSH-së për kauzën numër 1 është i pakontestueshëm.
Kur po digjej Drenica, si parti qeveritare, UDSH organizon tubim përkrahjeje për aspiratat legjitime të popullit të Kosovës, duke dënuar dhunën e regjimit policor të diktatorit Millosheviq, duke thënë se viktimat e Kosovës janë edhe tonat dhe se fitoret e saj do të jenë edhe tonat. Në këtë tubim të marsit të vitit 1998 është dëgjuar edhe fjalia: "Orët në shkollat tona, meshat në kishat tona, namazet në xhamitë tona, mëngjezet në shtëpitë tona duhet të fillojnë me lutje për Kosovën". Dhe tjetra: "Mund të ketë prapë dhunë, mund të ketë prapë gjak, mund të ketë prapë varre, por s`ka diktator as polici që mund të ndalë rrugën e Kosovarëve për liri!"
Prononcime e deklarata të ngjashme janë dëgjuar nga përfaqësuesi i UDSH-së në Parlamentin e Malit të Zi edhe gjatë bombardimeve të NATO-s, kur në Mal të Zi ndodheshin rreth 100 mijë shqiptarë të dëbuar nga Kosova dhe kur të tjerët po heshtnin.
Përfaqësuesi i UDSH-së jep dorëheqje nga Komisioni për hartimin e Kartës Kushtetuese të shtetit të përbashkët të Serbisë e Malit të Zi, kur ky kishte vendosur që Preambula e saj ta quante Kosovën “krahinë autonome të Serbisë”. - Nuk mund flitet për Kosovën pa përfaqësuesit legjitimë të saj - kishte thënë ai.
Paraprakisht, gjatë një darke me disa anëtarë të Komisionit, ai kishte braktisur tavolinën kur pas saj ia kishte behur kryevrasësi i ushtrisë së Millosheviqit në Kosovë, gjenerali Nebojsha Pavkoviq, tash banues i Hagës. - Me të tillë unë nuk rri - i kishte thënë ai shefit të delegacionit malazez. Darka kishte qenë në Beograd.
Tash, disa që asokohe nuk dukeshin asgjëkundi, pyesin se çka ka bërë UDSH-ja për Kosovën! Ata harrojnë se në vitrinat e UDSH-së, për këto dhe për shumë kontribute të tjera, është Medalja e Artë e Lidhjes së Prizrenit, nga presidenti historik Ibrahim Rugova.
I vetëdijshëm se pa epilogun fatlum të kauzës nr. 1 të kohës nuk mund të flitet për realizime shqiptare, UDSH-ja shfrytëzon çdo rast për ta ndihmuar sadopak këtë.
Në vitin 1997 një lider u tha "Jo" politikave të Millosheviqit. Millo Gjukanoviq e bëri publik angazhimin për pavarësimin e Malit të Zi partneritetin me të, që në atë moment, UDSH e bën imperativ të veprimit politik. Ai në vitin 1998 hyn në Qeverinë të cilën e drejtonte partia e tij, në çdo takim me ndërkombëtarët avancon politikat e tij, në të gjitha zgjedhjet presidenciale përkrah kandidaturat e partisë së tij, nuk çon shumë pluhur për çështje më të vogla, as kur për këtë ka arsye objektive… sepse po afrohej pavarësia. Po afrohej Referendumi i pavarësisë i 21 majit 2006. UDSH ka qenë e vetmja parti shqitpare që ka marrë pjesë aktive në fushatën e Referendumit dhe përcillte me keqardhje thirrjet për bojkot ose pozicionimin asnjanës të partive të tjera shqiptare. Por, pjesë aktive, për fat të mirë morën edhe të gjithë shqiptarët me të drejtë vote, të cilët me 21 maj kanë përkrahur pavarësinë e Mali të Zi.
Mali i Zi i pavarur ka njohur më 9 tetor, Kosovën e pavarur, të shpallur më 17 shkurt të këtij viti.
Kështu vulosen marrëdhëniet e reja në Ballkan. UDSH-ja ka hise në këtë vulë. Andaj nga pozita e kryetarit të tij, mund t`i them me krenari: M`I GËZOFSH 15 PRANVERA!

Të ndahet shapi nga sheqeri 6.11.2008
Njohja e Kosovës së Pavarur nga Ana e Qeverisë së Malit të Zi ka rentgenizuar më së miri skenën e këtushme politike dhe subjektet që e bëjnë atë. Duke ditur se Kosova në fundshekullin e shkuar dhe në fillim të këtij shekulli ka qenë kauza nr. 1 e shqiptarëve në Ballkan, reagimet e partive politike parlamentare ndaj vendimit të Qeverisë është pritur të heqin çdo iluzion se partitë shqiptare mund t`u sjellin ndonjë të mirë shqiptarëve duke bashkëpunuar me partitë opozitare serbe ose proserbe në Mal të Zi.
Protestat e opozitës, të organizuara pak ditë pas këtij vendimi nga ana e Listës Serbe, Partisë Socialiste Popullore dhe Partisë Popullore, të përkrahura edhe nga Lëvizja për Ndryshime, në të cilat është kërkuar që Qeveria të anulojë vendimin, kanë treguar qartë se ata që i quajnë terroristë udhëheqësit e shqiptarëve të Kosovës nuk mund të jenë miq të shqiptarëve në Mal të Zi.
Por dy parti shqiptare vazhdojnë të sillen sikur asgjë të mos kishte ndodhur. Alternativa Shqiptare dhe Lidhja Demokratike në Mal të Zi vazhdojnë të ruajnë koalicionin me njërën nga partitë që ka qenë shumë e zëshme në protestat e lartëpërmendura, me Partinë Socialiste Popullore, me të cilën mbajnë pushtetin në Komunën Urbane të Tuzit.
Vërtetë, këto dy parti shqiptare dhe të gjitha partitë që morën pjesë në protesta janë angazhuar për komunë të plotë të Tuzit, kur UDSH-ja me ndërmjetësimin amerikan, ka përkrahur si zgjidhje kalimtare komunën urbane të draftit të dytë, me shumë më tepër elemente të vetëqeverisjes lokale, në kufijtë administrativë që përkojnë me ata etnikë.
Njëri prej elementeve që e kishte shtyrë UDSH-në që të përkrahte këtë projekt-pilot ishte edhe ai se komuna e plotë e Tuzit asokohe do të sillte në pushtet në Podgoricë partitë e protestave kundër Kosovës, partitë serbe e proserbe. Marrja e Podgoricës do të kishte rrezikuar edhe pushtetin në nivel të Malit të Zi, atë pushtet i cili këtyre ditëve ka njohur Kosovën, duke u ballafaquar me protesta të dhunshme të partive që përkrahin komunën e plotë të Tuzit! Dhuna dhe urrejtja ndaj shqiptarëve, e shprehur në këto protesta, tregon më së miri se qarin e komunës së plotë për Malësinë, të bërë në pazarin me partitë serbe do e kishte ngrënë qiraja rrugës. Komuna e plotë duhet të bëhet kur të mos jetë qiraja aq e lartë dhe me forcat e pavarësisë.
Pra, si është e mundur që LD në MZ dhe ASH ta mbajnë peng Malësinë me partinë, kryetari i së cilës ka derdhur aq shumë lotë këtyre ditëve për Kosovën?! Mua më çudit më shumë LD në MZ, si parti e parë shqiptare, se liderët e ASH janë pjekur nga mosha para se t`u binte ndërmend të formonin parti shqiptare. Ata, madje, kanë ardhur në pushtet, në krahët e manipulimit të çështjes së komunës urbane, pas një fushate, gjatë të cilës janë dëgjuar për të parën herë edhe ofendime ndërshqiptare mbi baza fetare.
ASH është dalluar më tepër se LD në MZ edhe në disa momente kyçe të proceseve demokratike në Mal të Zi. Në prag të referendumit për pavarësinë e Malit të Zi nga radhët e të parës janë dëgjuar zëra për bojkot të tij, derisa e dyta ka qenë asnjanëse. Vetëm UDSH e ka shprehur publikisht se pavarësia e Malit të Zi është interes vital për shqiptarët, gjë që e kanë patur të qartë të gjithë shqiptarët sepse e kanë përkrahur pavarësinë. Po të ishin sjellë si dy parti të tyre, tjerë tupana kishin rënë në Dardani.
Partitë e tjera shqiptare, përveç UDSH-së, kanë favorizuar kandidatin e opozitës, ose kanë qenë asnjanëse edhe në prag të zgjedhjeve të fundit presidenciale. Kanakar i tyre ka qenë lideri i Lëvizjes për Ndryshime, z. Medojeviq, i cili ka përkrahur projektet kundër njohjes së Kosovës.
Edhe gjatë punës për nxjerrjen e Kushtetutës së re të Malit të Zi, që është hartuar nën mbikqyrjen e ekspertëve europianë, LD në MZ dhe ASH janë rreshtuar në anën e opozitës proserbe, duke tentuar të molisnin forcat e pavarësisë në pushtet dhe duke bartur ujë në mullirin e politikave serbe. UDSH -së as kësaj radhe, natyrisht, nuk i ka shkuar ndërmend të kërkojnë më shumë të drejta për shqiptarët në sportelet e bosave serbë.
Hajt se lidhur me pavarësinë dhe me ngjarjet e tjera në Mal të Zi, por LD në MZ dhe ASH nuk iu çkapën opozitës proserbe as kur ngjarjet e këtushme lidhen drejtpërsëdrejti me Kosovën. Para se Qeveria të merrte vendim për njohjen e Kosovës, pozita malazeze (PDS e Gjukanoviqit dhe PSD e Krivokapiqit) i kishte propozuar Parlamentit rezolutën për integrime që hapte rrugë edhe për njohjen e Kosovës.
E tërë opozita duke nuhatur se çka po ndodhte dhe duke e patur halë në sy njohjen e Kosovës, kishte kërkuar tërheqjen nga procedura të kësaj rezolute dhe këtë kërkesë e kishin nënshkruar të gjithë liderët e partive opozitare. Besoni a jo, nënshkrimin në këtë kërkesë e kishte vënë edhe deputeti i ASH, z. Sinishtaj! Kryetari i LD në MZ e deputet i saj, z. Bardhi edhe kësaj here e kishte fshehur dorën. Në kërkesë figuronte vetëm emri i partisë së tij.
Po t`ia kishte vënë veshin pozita kësaj kërkese, kushedi kur e kishte njohur Mali i Zi Kosovën dhe kushedi çfarë kahjeje kishin marrë ngjarjet politike në Mal të Zi e në rajon. Mirë se partitë serbe dhe ato të krajlit kishin fërkuar duart, po ç`gazep kishte dyshja Sinishtaj - Bardhi për t`i përkrahur këto parti e jo rezolutën që i hapte rrugë njohjes së Kosovës?!
A thua këta të dy vuajnë nga diçka që opinioni ende nuk e di?
Është evidente se sjelljet e këtilla u kishin sjellë dëm të pakompensueshëm shqiptarëve në Mal të Zi dhe më gjerë sikur të mos ua kishte marrë anën pozicionimi i sinqertë e pragmatik, realist e transparent, harmonizues e kombëtar i UDSH-së në skenën politike të Malit të Zi. Pa këtë pozicionim, të konsultuar vazhdimisht me qendra të tjera shqiptare dhe me faktorin ndërkombëtar, politikat shqiptare në Mal të Zi do të kishin qenë vetëm mëlmesë në gjellrat e kuzhinave serbe.
Është e çuditshme, nga ana tjetër, si sjelljet e sipërpërmendura nuk i kanë kritikuar asnjëherë intelektualë, gazetarë e veprimtarë të mirëfilltë, as këtu as në diasporë. Përkundrazi, intelektualë, gazetarë e veprimtarë të rrëjshëm, këtu e në diasporë, së bashku me liderë të caktuar të LD në MZ e të ASH, janë munduar kohëve të fundit të udhëheqin valle, të cilës ka mundur t`i shihej sherri edhe më shumë seç po ja shohin të burgosurit e manipuluar të Spuzhës dhe familjarët e tyre malësorë. Në epokën e shqiptarëve që është para nesh ne nuk mund të hyjmë pa e dalluar fytyrën nga dyftyrësia, të vërtetën nga gënjeshtra, të mundshmen nga e pamundshmja, njeriun nga i panjeri…Ne na duhet një katarzë e brendshme për të evituar dëmin që është bërë në kontaktet tona brendashqiptare nga grupe me borxhe të vjetra, të cilat në një fazë, duke u shërbyer me të pavërteta të paskrupullta, ia kishin dalë të manipulonin me një pjesë të masës sonë të ndershme e të sinqertë, por naïve, duke ua lavdëruar dorëzën e thikës, tehun e së cilës e kishin mprehur për shpatullat tona.
Është koha të ndahet shapi nga sheqeri, e vërteta nga e pavërteta, dija nga injoranca. Është koha të jepet llogari për sjelljet tona në mënyrë që vetëm argumenti të na shërbejë për kontakte të ndërsjella dhe për ruajtjen e heterogjenisë fetare brenda organizmit tonë të vetëm kombëtar. Vetëm argumenti të na shërbejë për të punuar tutje në faktorizimin e shqiptarëve në Mal të Zi në situatën e marrëdhënieve të reja në Ballkan, me të cilën s`kemi pse të jemi të pakënaqur. Me shtetin e ri të Kosovës, me Shqipërinë në NATO, me Malin e Zi pa Serbi, me ruajtjen e miqësisë shqiptaro-amerikane, s`kemi pse të druajmë për të ardhmen.
Ferhat Dinosha
Koha Javore

Tekstet e prezentuara domosdoshmërisht nuk përfaqësojnë politikën e redaksisë të www.ulqini.de  nuk jep përgjigje për faqe externe
Inhaltlich Verantwortlicher gemäß § 6 MDStV: Shaban Burri
Haftungshinweis: Trotz sorgfältiger inhaltlicher Kontrolle übernehmen wir keine Haftung für die Inhalte externer Links. Für den Inhalt der verlinkten Seiten sind ausschließlich deren Betreiber verantwortlich.Der Inhalt muss nicht mit den Vorstellungen von uns übereinstimmen.